Century II est le deuxième siècle de Nostradamus, publié pour la première fois en 1555.
Century II[]
- 1
- Vers Aquitaine par insuls Britaniques
- Et par eux mesmes grandes incursions
- Pluyes, gelees feront terroirs iniques
- Port Selyn fortes fera inuasions.
- 2
- La teste bleuë fera la teste blanche
- Autant de mal que France à fait leur bien,
- Mort à l'anthenne, grand pendu sur la branche,
- Quand des prins siens le Roy dira combien.
- 3
- Pour la chaleur solaire sus la mer
- De Negrepont les poissons demy cuits,
- Les habitans les viendront entamer
- Quand Rod & Gennes leur faudra le biscuit.
- 4
- Depuis Monech iusqu'au pres de Sicile
- Toute la plage demourra desolee,
- Il n'y aura faux-bourgs, Cité ne Ville
- Que par Barbare pillee & vollee.
- 5
- Quand dans poisson fer & lettre enfermee
- Hors sortira qui pis fera la guerre,
- Aura par mer sa classe bien ramee
- Apparoissant pres de Latine terre.
- 6
- Aupres des portes & dedans deux citez
- Seront deux fleaux onc n'apperceu vn tel,
- Faim dedans peste, de fer hors gens boutez,
- Crier secours au grand Dieu immortel.
- 7
- Entre plusieurs aux isles deportees,
- L'vn estre nay à deux dents en la gorge
- Mourront de faim, les arbres esbroutees
- Pour eux neuf Roy nouuel edit leur forge.
- 8
- Temples sacrez prime façon Romaine,
- Reietteront les goffes fondemens,
- Prenant leurs loix premieres & humaines
- Chassant, non tout, des saints les cultemens.
- 9
- Neuf ans le regne le maigre en paix tiendra
- Puis il cherra en soif si sanguinaire
- Pour luy grand peuple sans foy & loy mourra,
- Tué par vn beaucoup plus debonnaire.
- 10
- Auant long temps le tout sera rangé
- Nous esperons vn siecle bien senestre,
- L'estat des masques & des seule bien changé
- Peu trouueront qu'à son rang vueillent estre
- 11
- Le prochain fils de l'asnier paruiendra
- Tant esleué iusques au regne des forts,
- Son aspre gloire vn chacun la craindra,
- Mais ses enfans du regne iettez hours.
- 12
- Yeus clos ouuerts d'antique fantasie
- L'habit des seules seront mis à néant :
- Le grand monarque chastira leur frenaisie
- Rauir des temples le thresor par deuant.
- 13
- Le corps sans ame plus n'estre en sacrifice,
- Iour de mort mis en natiuité
- L'esprit diuin fera l'ame felice
- Voyant le verbe en son eternité.
- 14
- A Tours, Gien, gardé seront yeux penetrans,
- Descouuriront de loing la grand'seraine,
- Elle & sa suitte au port seront entrans,
- Combats, poussez, puissance souueraine.
- 15
- Vn peu deuant monarque trucidé,
- Castor Pollux en nef, astre crinite,
- L'erain public par terre & mer vuidé,
- Pise, ast, Ferrare, Turin, terre interdicte.
- 16
- Naples, Palerme, Sicile, Syracuses,
- Nouueaux tyrans, fulgures, feux celestes
- Forces de Londres, Gands, Bruxelles & Suses,
- Grand hecatombe, trumphe, faire festes.
- 17
- Le camp du temple de la vierge vestale,
- Non esloigné d'Ethene & monts Pyrenées :
- Le grand conduit est caché dans la male,
- North, getez, fleuues, & vignes mastinees.
- 18
- Nouuelle & pluye subite, impetueuse
- Empeshera subit deux exercices,
- Pierre, ciel, feux faire la mer pierreuse
- La mort de sept, terre & marin subites.
- 19
- Nouueaux venus, lieu basty sans deffence
- Occuper place par lors inhabitable,
- Prez, maisons, champs, villes prendre à plaisance,
- Faim, peste, guerre, arpen long labourable.
- 20
- Freres & Sœurs en plusieurs lieux captifs,
- Se trouueront passer pres du Monarque
- Les contempler ses rameaux ententifs,
- Desplaisant voir menton, frond, nez les marques.
- 21
- L'ambassadeur enuoyé par Byremes,
- A my-chemin d'incogneus repoussez,
- De tel renfort viendront quatre triremes,
- Cordes & chaines en Negrepont troussez.
- 22
- Le camp Aso, d'Eurotte partira,
- S'adioignant proche de l'isle submergee,
- D'Arton classe phalange pliera.
- Nombril du monde plus grand voix subroges.
- 23
- Palais oyseaux, par oyseau dechassé,
- Bien tost apres le prince paruenu,
- Combien qu'hors fleuue ennemy repoussé,
- Dehors saisi trait d'oyseau soustenu.
- 24
- Bestes farouches de faim fleuues tranner,
- Plus part du camp encontre Hister sera,
- En cage de fer le grand fera trainner,
- Qunad Rin enfant Germain obseruera.
- 25
- La garde estrange trahyra forteresse,
- Espoir & ombre du plus haut mariage,
- Garde deceue, fort prinse dans la presse,
- Loyre, Son, Rosne, Gar, à mort outragez.
- 26
- Pour la faueur que la cité fera,
- Au grand qui tost perdra champ de bataille
- Puis le rang Pau, Thesin versera
- De sang, feux, morts, noyez, de coups de taille.
- 27
- Le diuin verbe sera du ciel frappé
- Qui ne pourra proceder plus auant,
- Du reserant le secret estoupé
- Qu'on marchera par dessus & deuant.
- 28
- Le penultine du surnom de prophete
- Prendra Diane pour son iour & repos,
- Loing vaguera par frenetique teste,
- Et deliurant vn grand peuple d'imposts.
- 29
- L'oriental sortira de son siege,
- Passer les monts Apennins, voir la Gaule,
- Transpercera du ciel les eaux & neiges
- En vn chacun frappera de sa gaule.
- 30
- Vn qui les dieux d'Annibal infernaux
- Fera renaistre effrayeur des humains
- Oncq plus d'horreur, ne plus pire iournaux
- Qu'aduint viendra par Babel aux Romains.
- 31
- En campagne Cassilin fera tant
- Qu'on ne verra que d'eau les champs couuerts
- Deuant, apres, la pluye de long temps
- Hors mis les arbres rien l'on verra de vert.
- 32
- Laict, sang, grenoüilles escondre en Dalmatie
- Conflit donné, peste preste, de baleine
- Cry sera grand par toute Esclauonie,
- Lors naistra monstre pres & dedans Rauenne.
- 33
- Par le torrent qui descend de Veronne,
- Par lors qu'au Pol guindera son entree,
- Vn grand naufrage, & non moins en Garonne
- Quand ceux de Gennes marcheront leur contree,
- 34
- L'ire insensée du combat furieux,
- Fera à table par freres le fer luyre,
- Les departir mort blesse curieux,
- Le fier duelle viendra en France nuyre.
- 35
- Dans deux logis de nuict le feu prendra,
- Plusieurs dedans estouffez & rostis,
- Pres de deux fleuues pour seur il aduiendra
- Sol, l'Arc & Caper, tous seront amortis.
- 36
- Du grand Prophete les lettres seront prinses
- Entre les mains du tyran deuiendront,
- Frauder son Roy seront les entreprinses,
- Mais ses rapines bien tost le troubleront.
- 37
- De ce grand nombre que l'on enuoyera
- Pour secourir dans le fort assiegez,
- Peste & famine tous les deux deuorera,
- Hors mis septante qui seront profligez.
- 38
- Des condamnez sera fait vn grand nombre.
- Quand les Monarques seront conciliez :
- Mais l'vn d'eux viendra si mal encombre,
- Que guerre ensemle ne seront raliez.
- 39
- Vn an deuant le conflit Italique
- Germain, Gaulois, Espagnols pour le fort,
- Cherra l'escolle maison de republique,
- Ou, hors mis peu, seront suffoquez morts.
- 40
- Vn peu apres non point longue interualle
- Par mer & terre sera fait grand tumulte,
- Beaucoup plus grande sera pugne naualle,
- Feux, animaux, qui plus feront d'insulte.
- 41
- La grand, estoille par sept iours bruslera.
- Nuë fera deux Soleils apparoir,
- Le gros mastin toute nuict hurlera,
- Quand grand pontife changera de terroir.
- 42
- Coq, chiens, & chats, de sang seront repeus,
- Et de la playe du tyrant trouué mort :
- Au lict d'vn autre iambes & bras rompus,
- Qui n'auoit peu mourir de cruelle mort.
- 43
- Durant l'estoille cheueluë apparente,
- Les trois grands Princes seront faits ennemys,
- Frappez du ciel paix terre trembulente,
- pau, Tymbre, vndans, serpens sur le bord mis.
- 44
- L'aigle posee entour des pauillons,
- Par autres oyseaux d'entour sera chassee,
- Quand bruit des cymbres, tubes et sonnaillons
- Rendront le sens de la Dame insensee.
- 45
- Trop le ciel pleure l'androgin procreé
- Pres de ce ciel sang humain respandu,
- Par mort trop tarde grand peuple recreé,
- Tard & tost vient le secours attendu.
- 46
- Apres grâd trouble humain plus grâd s'appreste,
- Le grand moteur les siecles renouuelle,
- Pluye, sang, laict, famine, feu & peste :
- Au ciel veu feu, courant longue estincelle.
- 47
- L'ennemy grand vieil dueil meurt de poison
- Les souuerains par infinis subiuguez,
- Pierres plouuoir cachez soubs la toyson,
- Par mort articles en vain sont alleguez
- 48
- La grand coppie qui passera les monts,
- Saturne en l'Arc tournant du poisson Mars,
- Venins chachez soubs testes de Saulmons,
- Leurs chefs pendus à fil de polemars.
- 49
- Les conseillers du premier monopole,
- Les conquerans seduits par le Melite,
- Rhodes, Bisance pour leur exposant pole,
- Terre faudra les poursuiuants de fuitte.
- 50
- Quand ceux d'Hinault, Do, Gand & de Bruxelles
- Verront à Langres le siege deuant mis,
- Derriere leurs flancs seront guerres cruelles,
- La pluye antique, fera pis qu'ennemys.
- 51
- Le sang du iuste à Londres fera faute,
- Bruslez par foudres de vingt trois les six,
- La dame antique cherra de place haute,
- De mesme secte plusieurs seront occis.
- 52
- Dans plusieurs nuicts la terre tremblera,
- Sur le printemps deux efforts feront suitte,
- Corinthe, Ephese aux deux mers nagera,
- Guerre s'esmeut par deux vailants de luitte.
- 53
- La grande peste de cité maritime
- Ne cessera que mort ne soit vengee :
- Du iuste sang par pris damne sans crime,
- De la grand' dame par fainte n'outragee.
- 54
- Par gent estrange, & de Romains loingtaine,
- Leur grand cité apres eau fort troublee :
- Fille sans main, trop different domaine,
- Prins, chef terreure n'auoit este riblee.
- 55
- Dans le conflit le grand qui peu valloit
- A son dernier fera cas merueilleux :
- Pendant qu'Hadrie verra ce qu'il falloit,
- Dans le banquet pongnale l'orgueilleux.
- 56
- Que peste & glaiue n'a peu s'en definer,
- Mort dans le puys sommet du ciel frappé,
- L'abbé mourra quand verra ruyner
- Ceux du naufrage, l'escueil voulant grapper.
- 57
- Auant conflit le grand mur tombera,
- Le grand à mort, mort trop subite & plainte
- Nef imparfaict : la plus part nagera,
- Aupres du fleuue de sang la terre tainte.
- 58
- Sans pied ne main dent ayguë & forte
- Par globe au fort de porc & l'aisné nay,
- Pres du portail desloyal se transporte,
- Silene luyt petit grand emmené.
- 59
- Classe Gauloise par appuy de grand'garde,
- Du grand Neptune, & ses tridens soldats,
- Rongee prouence pour soustenir grand'bande,
- Plus Mars Narbon par iauelots & dards.
- 60
- La foy Punique en Orient rompuë,
- Gang, lud. & Rosne, Loyre & Tag. changeront,
- Quand du mulet la faim sera repuë,
- Classe espargie sang & corps nageront.
- 61
- Euge, Tamins, Gironde & la Rochelle,
- Osang Troien mort au port de la flesche,
- Derriere le fleuue au fort mise l'eschelle,
- Pointes feu grand meurtre sus la breche.
- 62
- Mabus puis tost alors mourra viendra,
- De gens & bestes vne horrible deffaite,
- Puis tout à coup la vengeance on verra,
- Cent, main, soif, faim, quand courra la comette.
- 63
- Gaulois, Ausone, bien peu subiuguera,
- Pau, Marne, & Seine fera Perme l'vrie :
- Qui le grand mur contre eux dressera,
- Du moindre au mur le grand perdra la vie.
- 64
- Seicher de faim, de soif gent Geneuoise,
- Espoir prochain viendra au defaillir,
- Sur point tremblant sera loy Gebenoise,
- Classe au grand port ne se peut accueillir.
- 65
- Le parc enclin grande calamité,
- Par l'Hesperie & Insubre fera,
- Le feu en nef, peste & captiuité,
- Mercure en l'arc, Saturne fenera.
- 66
- Par grands dangers le captif eschappé,
- Peu de temps grand la fortune changee.
- Dans le palais le peuple est attrapé,
- Par bon augure la Cité assiegee.
- 67
- La blonde au nez forché viendra commettre
- Par le duelle & chassera dehors,
- Les exilez dedans fera remettre
- Aux lieux marins commettant les plus forts.
- 68
- De l'Aquilon les efforts seront grands,
- Sur l'Ocean sera la porte ouuerte,
- Le regne en l'isle sera reintegrand,
- Tremblera Londres par voille descouuerte.
- 69
- Le Roy Gaulois par la Celtique dextre
- Voyant discorde de la grand Monarchie,
- Sur les trois parts fera fleurir son sceptre,
- Contre la cappe de la grand Hierarchie.
- 70
- Le dard du Ciel fera son estenduë,
- Morts en parlant grande execution,
- La pierre en l'arbre la fiere gent renduë,
- Bruit humain monstre, purge expiration.
- 71
- Les exilez en Sicile viendront,
- Pour deliurer la gent estrange :
- Au point du iour les Celtes luy faudront,
- La vie demeure à raison Roy se range.
- 72
- Armee Celtique en Italie vexee,
- De toutes parts conflit & grande perte,
- Romains fuis, ô Gaule repoussee,
- Pres du Thesin, Rubicon pugne incerte.
- 73
- Au lac Fucin de Benac le riuage,
- Prins du Leman ou port de l'Origuion.
- Nay de trois bras predict belliq' image.
- Par trois couronnes au grand Endymion.
- 74
- De Sens, d'Autun viendront iusques au Rosne
- Pour passer outre vers les monts Pyrennees
- La gent sortir de la marque d'Auconne,
- Par terre & mer le suyura à grands trainnées.
- 75
- La voix ouye de l'insolit oyseau,
- Sur le canon du respiral estage :
- Si haut viendra de froment le boisseau,
- Que l'homme d'homme sera Antropophage.
- 76
- Foudre en Bourgogne fera cas portenteux,
- Que par engin homme ne pourroit faire :
- De leur senat sacrifiste fait boyteux,
- Fera sçauoir aux ennemis l'affaire,
- 77
- Par arcs, feux, poix & par feu repoussez,
- Crys, hurlemens sur la minuict ouys :
- Dedans sont mis par les ramparts cassez,
- Par cunicule les traditeurs fuis.
- 78
- Le grand Neptune du profond de la mer,
- De gent bunique & sang Gaulois meslé :
- Les isles à sang, pour le tardif ramer,
- Plus luy nuyra que l'occult mal celé.
- 79
- La barbe crespe & noire par engin,
- Subiuguera la gent cruelle & fiere :
- Vn grand Chyren ostera du longin,
- Tous les captifs par Seline baniere.
- 80
- Apres conflit du Ieffé l'éloquence,
- Par peu de temps se tramme faim, repos,
- Point on n'admet les grands à deliurance,
- Des ennemis sont remis à propos.
- 81
- Par feu du Ciel la cité pres qu'aduste,
- Vrna menasse encor Ceucalion,
- Vexee Sardagne par la punique fuste,
- Apres que Libra lairra son Phaeton.
- 82
- Par faim la proye sera loup prisonnier,
- L'assaillant hors en extreme detresse :
- Vn nay ayant au deuant le dernier,
- Le grand n'eschappe au milieu de la presse.
- 83
- Par le traffic du grand Lyon changé
- Et la plus-part tourné en pristine ruine.
- Proye aux soldats par pille vendangé,
- Par Iura mont & Sueue bruine.
- 84
- Entre Champagne, Sienne, Flora, Tustie,
- Six mois neuf iours ne pleuuera vne goutte :
- Estrange langue en terre d'Almatie,
- Courira sus, gastant la terre toute,
- 85
- Vieux plains de barbe sous le statut seuere
- A Lyon fait dessus l'Aigle Celtique :
- Le petit grand trop outre perseuere,
- Bruit d'armes au ciel, mer rouge Lygustique.
- 86
- Naufrage à classe pres d'onde Hadriatique,
- La terre esmeuë sus lair en terre mis :
- Egypte tremble augment Mahommetique,
- Heraut se rendre à crier est commis.
- 87
- Apres viendra des extremes contrees
- Prince Germain sur le throsne doré :
- En seruitude & par eaux rencontrees
- La dame serue, son temps plus n'a duré.
- 88
- Le circuit du grand fait ruyneux,
- Au nom septiesme le cinquiesme sera :
- D'vn tiers plus grand l'estrange belliqueux
- Mouton, Lutece, Aix garantira.
- 89
- Vn iour seront damis les deux grands maistres
- Leur grand pouuoir se verra augmenté :
- La terre neufue sera en ses hauts estres,
- Au sanguinaire, le nombre racompté.
- 90
- Par vie & mort changé regne d'Hongrie,
- La loy sera plus aspre que seruice :
- Leur grand cité d'vrlemens, plaints & cris,
- Castor & Pollux ennemis dans la lice.
- 91
- Soleil leuant vn grand feu on verra,
- Bruit & clarté vers Aquilon tendant :
- Dedans le rond mort & cris on orra,
- Par glaiue, feu, faim mort les attendans.
- 92
- Feu, couleur d'or du ciel en terre veu,
- Frappé du haut n'ay, fait cas merueilleux :
- Grand meurtre humain, prinse du grand neueu,
- Morts d'expectacles, eschappé l'orgueilleux.
- 93
- Bien pres du Tymbre presse la Lybitine,
- Vn peu deuant grand inondation :
- Le chef du nef prins, mis en la sentine,
- Chasteau, palais en conflagration.
- 94
- Gran, Po, grand mal pour Gaulois receura,
- Vaine terreur au maritin Lyon :
- Peuple infiny par la mer passera,
- Sans eschapper vn quart d'vn million.
- 95
- Les lieux peuplez seront inhabitables,
- Pour champs auoir grande diuision :
- Regnes liurez à prudens incapables,
- Entre les freres mort & dissention.
- 96
- Flambeau ardant au ciel sera veu,
- Pres de la fin & principe du Rosne,
- Famine, glaiue, tard le secours pourueu,
- La Perse tourne enuahit Macedoine.
- 97
- Romain Pontife garde de t'aprocher,
- De la cité qui deux fleuues arrouse :
- Ton sang viendras aupres de là cracher
- Toy & les tiens quand fleurira la rose,
- 98
- Celuy du sang resperse le visage,
- De la victime proche sacrifice,
- Tonant en leo augure presage,
- Mais estre à mort lors pour la fiancee.
- 99
- Terroir Romain qu'interpretoit augure,
- Par gent Gauloise par trop sera vexee
- Mais nation Celtique craindra l'heure,
- Boreas, classe trop loing l'auoir poussee.
- 100
- Dedans les isles si horrible tumulte,
- Rien on n'orra qu'vne bellique brigue,
- Tant grand sera des prediteurs l'insulte,
- Qu'on se viendra ranger à la grand ligue.
